ਔਰਤ ਤੋਂ ‘ਡਿਜੀਟਲ ਅਰੈਸਟ’ ‘ਚ ਠੱਗੇ 31.83 ਕਰੋੜ ਰੁਪਏ

ਬੈਂਗਲੁਰੂ ਦੀ ਇਕ 57 ਸਾਲ ਦੀ ਔਰਤ ਨੇ ਕਥਿਤ ਤੌਰ ਉਤੇ ‘ਡਿਜੀਟਲ ਅਰੈਸਟ’ ਘਪਲੇ ’ਚ ਕਰੀਬ 32 ਕਰੋੜ ਰੁਪਏ ਗੁਆ ਦਿਤੇ ਹਨ। ਘਪਲਾ ਛੇ ਮਹੀਨਿਆਂ ਤਕ ਚਲਿਆ, ਜਿਸ ਤੋਂ ਬਾਅਦ ਕੇਸ ਦਰਜ ਕੀਤਾ ਗਿਆ। ਸੀ.ਬੀ.ਆਈ. ਦੇ ਅਧਿਕਾਰੀ ਵਜੋਂ ਪੇਸ਼ ਹੋ ਕੇ, ਧੋਖੇਬਾਜ਼ਾਂ ਨੇ ਉਸ ਨੂੰ ਲਗਾਤਾਰ ਸਕਾਈਪ ਨਿਗਰਾਨੀ ਹੇਠ ਰੱਖ ਕੇ ‘ਡਿਜੀਟਲ ਅਰੈਸਟ’ ਹੇਠ ਰਖਿਆ। ਇਸ ਦੌਰਾਨ ਉਨ੍ਹਾਂ ਨੇ ਉਸ ਨੂੰ ਗ੍ਰਿਫ਼ਤਾਰੀ ਦੀ ਧਮਕੀ ਦੇ ਕੇ ਸਾਰੇ ਵਿੱਤੀ ਵੇਰਵੇ ਸਾਂਝੇ ਕਰਨ ਅਤੇ 187 ਬੈਂਕ ਟਰਾਂਸਫਰ ਕਰਨ ਲਈ ਮਜਬੂਰ ਕੀਤਾ। ਸ਼ਹਿਰ ਦੇ ਇੰਦਰਾਨਗਰ ਵਿਚ ਸਾਫਟਵੇਅਰ ਇੰਜੀਨੀਅਰ ਵਜੋਂ ਕੰਮ ਕਰਨ ਵਾਲੀ ਔਰਤ ਨੇ ਅਪਣੀ ਸ਼ਿਕਾਇਤ ਵਿਚ ਕਿਹਾ ਕਿ ਇਹ ਤਸ਼ੱਦਦ ਛੇ ਮਹੀਨਿਆਂ ਤੋਂ ਵੱਧ ਸਮੇਂ ਤਕ ਚਲਿਆ, ਜਦੋਂ ਤਕ ਕਿ ਉਸ ਨੂੰ ਧੋਖੇਬਾਜ਼ਾਂ ਤੋਂ ‘ਕਲੀਅਰੈਂਸ ਲੈਟਰ’ ਨਹੀਂ ਮਿਲਿਆ। ਇਹ ਠੱਗੀ 15 ਸਤੰਬਰ, 2024 ਨੂੰ ਡੀ.ਐਚ.ਐਲ. ਅੰਧੇਰੀ ਤੋਂ ਸ਼ੁਰੂ ਹੋਇਆ ਸੀ, ਜਿਸ ਵਿਚ ਇਕ ਵਿਅਕਤੀ ਨੇ ਕਾਲ ਕਰ ਕੇ ਦਾਅਵਾ ਕੀਤਾ ਸੀ ਕਿ ਉਸ ਦੇ ਨਾਮ ਉਤੇ ਬੁੱਕ ਕੀਤੇ ਗਏ ਇਕ ਪਾਰਸਲ ਵਿਚ ਕ੍ਰੈਡਿਟ ਕਾਰਡ, ਪਾਸਪੋਰਟ ਅਤੇ ਐਮ.ਡੀ.ਐਮ.ਏ. ਸਨ, ਅਤੇ ਕਿਹਾ ਗਿਆ ਸੀ ਕਿ ਉਸ ਦੀ ਪਛਾਣ ਦੀ ਦੁਰਵਰਤੋਂ ਕੀਤੀ ਗਈ ਸੀ। ਇਸ ਤੋਂ ਪਹਿਲਾਂ ਕਿ ਔਰਤ ਜਵਾਬ ਦਿੰਦੀ, ਕਾਲ ਸੀ.ਬੀ.ਆਈ. ਅਧਿਕਾਰੀਆਂ ਦੇ ਰੂਪ ਵਿਚ ਲੋਕਾਂ ਨੂੰ ਟਰਾਂਸਫਰ ਕਰ ਦਿਤੀ ਗਈ, ਜਿਨ੍ਹਾਂ ਨੇ ਉਸ ਨੂੰ ਧਮਕੀ ਦਿਤੀ ਅਤੇ ਦਾਅਵਾ ਕੀਤਾ ਕਿ ‘ਸਾਰੇ ਸਬੂਤ ਤੁਹਾਡੇ ਵਿਰੁਧ ਹਨ।’ ਧੋਖੇਬਾਜ਼ਾਂ ਨੇ ਉਸ ਨੂੰ ਪੁਲਿਸ ਨਾਲ ਸੰਪਰਕ ਕਰਨ ਦੀ ਚੇਤਾਵਨੀ ਦਿੰਦੇ ਹੋਏ ਕਿਹਾ ਕਿ ਅਪਰਾਧੀ ਉਸ ਦੇ ਘਰ ਉਤੇ ਨਜ਼ਰ ਰੱਖ ਰਹੇ ਹਨ। ਅਪਣੇ ਪਰਵਾਰ ਅਤੇ ਅਪਣੇ ਬੇਟੇ ਦੇ ਆਉਣ ਵਾਲੇ ਵਿਆਹ ਦੇ ਡਰ ਤੋਂ ਉਹ ਚੁੱਪ ਰਹੀ।