10,000 ਸਾਲਾਂ ਬਾਅਦ ਫਟਿਆ ਜਵਾਲਾਮੁਖੀ,ਭਾਰਤ ਦੇ ਇਹਨਾਂ ਸੂਬਿਆਂ ‘ਚ ਵੀ Alert ਜਾਰੀ

ਅਫ਼ਰੀਕੀ ਦੇਸ਼ ਇਥੋਪੀਆ (Ethiopia) ਵਿੱਚ ਹਜ਼ਾਰਾਂ ਸਾਲਾਂ ਤੋਂ ਸ਼ਾਂਤ ਪਿਆ ‘ਹੇਲੀ ਗੁੱਬੀ’ (Hayli Gubbi) ਜਵਾਲਾਮੁਖੀ ਅਚਾਨਕ ਫਟ ਗਿਆ। ਦੱਸ ਦੇਈਏ ਕਿ ਇਸ ਜਵਾਲਾਮੁਖੀ ਦੇ ਫਟਣ ਨਾਲ ਭਾਰਤ ‘ਤੇ ਇੱਕ ਨਵਾਂ ਸੰਕਟ ਮੰਡਰਾਉਣ ਲੱਗਾ ਹੈ। ਕਿਹਾ ਜਾ ਰਿਹਾ ਹੈ ਕਿ ਜਵਾਲਾਮੁਖੀ ਵਿੱਚ ਹੋਏ ਭਿਆਨਕ ਧਮਾਕੇ ਤੋਂ ਬਾਅਦ ਉੱਥੋਂ ਨਿਕਲਿਆ ਸੁਆਹ (ash) ਦਾ ਵਿਸ਼ਾਲ ਗੁਬਾਰ ਹੁਣ ਤੇਜ਼ੀ ਨਾਲ ਭਾਰਤ ਵੱਲ ਵਧ ਰਿਹਾ ਹੈ।ਮੌਸਮ ਏਜੰਸੀਆਂ ਮੁਤਾਬਕ, ਇਹ ਜ਼ਹਿਰੀਲਾ ਬੱਦਲ ਅੱਜ ਸ਼ਾਮ ਤੱਕ ਪੱਛਮੀ ਭਾਰਤ ਵਿੱਚ ਦਾਖਲ ਹੋ ਜਾਵੇਗਾ ਅਤੇ ਰਾਤ ਹੁੰਦੇ-ਹੁੰਦੇ ਇਸਦਾ ਅਸਰ ਉੱਤਰੀ ਭਾਰਤ ਦੇ ਕਈ ਸੂਬਿਆਂ ਵਿੱਚ ਦੇਖਣ ਨੂੰ ਮਿਲ ਸਕਦਾ ਹੈ, ਜਿਸ ਨਾਲ ਹਵਾਈ ਯਾਤਰਾ ਅਤੇ ਵਾਤਾਵਰਣ ਪ੍ਰਭਾਵਿਤ ਹੋਣ ਦਾ ਖ਼ਦਸ਼ਾ ਹੈ। IndiaMetSky ਵੈਦਰ ਦੀ ਰਿਪੋਰਟ ਅਨੁਸਾਰ, ਸੁਆਹ ਦੇ ਇਹ ਬੱਦਲ ਅੱਜ ਸ਼ਾਮ ਨੂੰ ਸਭ ਤੋਂ ਪਹਿਲਾਂ ਗੁਜਰਾਤ (Gujarat) ਦੇ ਰਸਤੇ ਪੱਛਮੀ ਹਿੱਸੇ ਵਿੱਚ ਦਾਖਲ ਹੋਣਗੇ। ਰਾਤ 10 ਵਜੇ ਤੱਕ ਇਨ੍ਹਾਂ ਦੇ ਰਾਜਸਥਾਨ (Rajasthan), ਉੱਤਰ-ਪੱਛਮੀ ਮਹਾਰਾਸ਼ਟਰ (Maharashtra), ਦਿੱਲੀ (Delhi), ਹਰਿਆਣਾ (Haryana) ਅਤੇ ਪੰਜਾਬ (Punjab) ਵੱਲ ਵਧਣ ਦੀ ਪ੍ਰਬਲ ਸੰਭਾਵਨਾ ਹੈ। ਬਾਅਦ ਵਿੱਚ ਇਹ ਹਿਮਾਲਿਆ (Himalayas) ਅਤੇ ਹੋਰ ਖੇਤਰਾਂ ਨੂੰ ਵੀ ਆਪਣੀ ਲਪੇਟ ਵਿੱਚ ਲੈ ਸਕਦਾ ਹੈ।ਵਾਯੂਮੰਡਲ ਵਿੱਚ ਫੈਲਿਆ ਇਹ ਗੁਬਾਰ 100 ਤੋਂ 120 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਅੱਗੇ ਵਧ ਰਿਹਾ ਹੈ। ਇਹ ਜ਼ਮੀਨ ਤੋਂ 15,000 ਤੋਂ ਲੈ ਕੇ 45,000 ਫੁੱਟ ਦੀ ਉਚਾਈ ‘ਤੇ ਉੱਡ ਰਿਹਾ ਹੈ। ਇਸ ਬੱਦਲ ਵਿੱਚ ਜਵਾਲਾਮੁਖੀ ਦੀ ਸੁਆਹ, ਸਲਫਰ ਡਾਈਆਕਸਾਈਡ (Sulfur Dioxide) ਅਤੇ ਕੱਚ ਤੇ ਚੱਟਾਨ ਦੇ ਬਾਰੀਕ ਕਣ ਮੌਜੂਦ ਹਨ। ਚੇਤਾਵਨੀ ਦਿੱਤੀ ਗਈ ਹੈ ਕਿ ਇਸ ਕਾਰਨ ਅਸਮਾਨ ਆਮ ਨਾਲੋਂ ਜ਼ਿਆਦਾ ਗੂੜ੍ਹਾ ਅਤੇ ਧੁੰਦਲਾ (Hazy) ਦਿਖਾਈ ਦੇ ਸਕਦਾ ਹੈ।