ਵਿਦੇਸ਼ ਮੰਤਰਾਲੇ (MEA) ਵੱਲੋਂ ਸੋਧੇ ਹੋਏ ਨਿਯਮਾਂ ਅਨੁਸਾਰ, 15 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਜਾਰੀ ਕੀਤੇ ਜਾਣ ਵਾਲੇ ਪਾਸਪੋਰਟ ਹੁਣ ਪੰਜ ਸਾਲਾਂ ਲਈ ਜਾਂ ਬੱਚੇ ਦੇ 18 ਸਾਲ ਦੇ ਹੋਣ ਤੱਕ, ਜੋ ਵੀ ਪਹਿਲਾਂ ਹੋਵੇ, ਵੈਧ ਹੋਣਗੇ।ਵੀਰਵਾਰ ਨੂੰ ਭਾਰਤ ਦੇ ਸਰਕਾਰੀ ਗਜ਼ਟ ਵਿੱਚ ਪ੍ਰਕਾਸ਼ਿਤ ਕੀਤੇ ਗਏ ਨਵੇਂ ‘ਪਾਸਪੋਰਟ (ਸੋਧ) ਨਿਯਮ, 2026’ ਰਾਹੀਂ ਪੁਰਾਣੇ ‘ਪਾਸਪੋਰਟ ਨਿਯਮ, 1980’ ਵਿੱਚ ਬਦਲਾਅ ਕੀਤਾ ਗਿਆ ਹੈ।ਸੋਧੇ ਹੋਏ ਨਿਯਮ 12(1A) ਅਨੁਸਾਰ, 15 ਸਾਲ ਤੋਂ ਘੱਟ ਉਮਰ ਦੇ ਬੱਚੇ ਨੂੰ ਜਾਰੀ ਕੀਤਾ ਗਿਆ ਇੱਕ ਸਧਾਰਨ 36-ਪੰਨਿਆਂ ਦਾ ਪਾਸਪੋਰਟ ਜਾਰੀ ਹੋਣ ਦੀ ਮਿਤੀ ਤੋਂ ਪੰਜ ਸਾਲਾਂ ਲਈ ਜਾਂ ਬੱਚੇ ਦੇ 18 ਸਾਲ ਦੇ ਹੋਣ ਤੱਕ, ਜੋ ਵੀ ਪਹਿਲਾਂ ਹੋਵੇ, ਵੈਧ ਹੋਵੇਗਾ।15 ਸਤੰਬਰ, 2026 ਦੀ ਮਿਤੀ ਵਾਲੇ ਨੋਟਿਸ ਰਾਹੀਂ ਪਾਸਪੋਰਟ ਅਰਜ਼ੀ ਫ਼ੀਸ ਨਾਲ ਸਬੰਧਤ ਨਿਯਮ 8 ਵਿੱਚ ਸੋਧ ਕੀਤੀ ਗਈ ਹੈ, ਜਿਸ ਵਿੱਚ ਦੱਸਿਆ ਗਿਆ ਹੈ ਕਿ ਹਰੇਕ ਅਰਜ਼ੀ ਸ਼੍ਰੇਣੀ ਲਈ ਫ਼ੀਸ ਨਿਯਮਾਂ ਦੇ ਸ਼ਡਿਊਲ IV ਵਿੱਚ ਦਰਸਾਏ ਅਨੁਸਾਰ ਹੋਵੇਗੀ। ਇਹ ਸੋਧੇ ਹੋਏ ਨਿਯਮ ਸਰਕਾਰੀ ਗਜ਼ਟ ਵਿੱਚ ਪ੍ਰਕਾਸ਼ਿਤ ਹੋਣ ਦੀ ਮਿਤੀ ਤੋਂ ਲਾਗੂ ਹੋਣਗੇ।ਨੋਟੀਫਿਕੇਸ਼ਨ ਵਿੱਚ ਕਿਹਾ ਗਿਆ ਹੈ ਕਿ ਪਾਸਪੋਰਟ ਨਿਯਮ, 1980 ਸ਼ੁਰੂ ਵਿੱਚ 11 ਦਸੰਬਰ, 1980 ਨੂੰ ਨੋਟੀਫਿਕੇਸ਼ਨ ਜੀ ਐੱਸ ਆਰ 691(ਈ) ਰਾਹੀਂ ਜਾਰੀ ਕੀਤੇ ਗਏ ਸਨ ਅਤੇ ਹਾਲ ਹੀ ਵਿੱਚ 20 ਜੂਨ, 2026 ਨੂੰ ਨੋਟੀਫਿਕੇਸ਼ਨ ਜੀ ਐੱਸ ਆਰ 156(ਈ) ਰਾਹੀਂ ਸੋਧੇ ਗਏ ਸਨ।
