ਦੁਨੀਆ ਭਰ ਵਿੱਚ 71 ਲੱਖ ਤੋਂ ਵੱਧ ਲੋਕਾਂ ਦੀ ਜਾਨ ਲੈਣ ਵਾਲੇ ਕੋਰੋਨਾ ਵਾਇਰਸ (Covid-19) ਦੀ ਉਤਪੱਤੀ ਨੂੰ ਲੈ ਕੇ ਇੱਕ ਵਾਰ ਫਿਰ ਵੱਡਾ ਸਿਆਸੀ ਅਤੇ ਵਿਗਿਆਨਕ ਭੂਚਾਲ ਆ ਗਿਆ ਹੈ। ਇਸ ਵਾਰ ਇਹ ਧਮਾਕਾ ਖੁਦ ਅਮਰੀਕਾ ਦੀ ਖ਼ੁਫ਼ੀਆ ਮੁਖੀ ਤੁਲਸੀ ਗਾਬਾਰਡ ਨੇ ਕੀਤਾ ਹੈ। ਆਪਣੇ ਕਾਰਜਕਾਲ ਦੇ ਆਖਰੀ ਦਿਨ ਗਾਬਾਰਡ ਨੇ ਕੁਝ ਅਜਿਹੇ ਗੁਪਤ ਅਤੇ ਸੰਵੇਦਨਸ਼ੀਲ ਦਸਤਾਵੇਜ਼ ਜਨਤਕ ਕੀਤੇ ਹਨ, ਜਿਨ੍ਹਾਂ ਨੇ ਅਮਰੀਕਾ ਦੇ ਚੋਟੀ ਦੇ ਵਿਗਿਆਨੀ ਡਾ. ਐਂਥਨੀ ਫਾਊਚੀ ਨੂੰ ਸਿੱਧੇ ਕਟਘਰੇ ਵਿੱਚ ਖੜ੍ਹਾ ਕਰ ਦਿੱਤਾ ਹੈ।ਤੁਲਸੀ ਗਾਬਾਰਡ ਦਾ ਦੋਸ਼ ਹੈ ਕਿ ਡਾ. ਐਂਥਨੀ ਫਾਊਚੀ ਨੇ ਚੀਨ ਦੀ ਉਸ ਵਿਵਾਦਿਤ ਵੁਹਾਨ ਲੈਬ ਨੂੰ ਲੱਖਾਂ ਡਾਲਰ ਦੀ ਫੰਡਿੰਗ ਦਿੱਤੀ ਸੀ, ਜਿਸ ਨੂੰ ਕੋਰੋਨਾ ਵਾਇਰਸ ਦੇ ਲੀਕ ਹੋਣ ਦਾ ਮੁੱਖ ਕੇਂਦਰ ਮੰਨਿਆ ਜਾਂਦਾ ਹੈ। ਤੁਲਸੀ ਗਾਬਾਰਡ ਵੱਲੋਂ ਜਾਰੀ ਕੀਤੇ ਗਏ ਖ਼ੁਫ਼ੀਆ ਦਸਤਾਵੇਜ਼ਾਂ ਮੁਤਾਬਕ, ਡਾ. ਫਾਊਚੀ ਨੇ ਵੁਹਾਨ ਇੰਸਟੀਚਿਊਟ ਆਫ ਵਾਇਰੋਲੋਜੀ ਨੂੰ ‘ਗੇਨ-ਆਫ-ਫੰਕਸ਼ਨ’ (Gain-of-Function) ਖੋਜ ਲਈ ਅਮਰੀਕੀ ਟੈਕਸਦਾਤਾਵਾਂ ਦੇ ਲੱਖਾਂ ਡਾਲਰ ਮੁਹੱਈਆ ਕਰਵਾਏ ਸਨ। ਇਹ ਖੋਜ ਚਮਗਿੱਦੜਾਂ ਵਿੱਚ ਪਾਏ ਜਾਣ ਵਾਲੇ ਕੋਰੋਨਾ ਵਾਇਰਸ ‘ਤੇ ਕੀਤੀ ਜਾ ਰਹੀ ਸੀ।ਤੁਲਸੀ ਗਾਬਾਰਡ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ (ਪਹਿਲਾਂ ਟਵਿੱਟਰ) ‘ਤੇ ਇੱਕ ਤਿੱਖਾ ਵੀਡੀਓ ਸੰਦੇਸ਼ ਜਾਰੀ ਕਰਕੇ ਅਮਰੀਕੀ ਪ੍ਰਸ਼ਾਸਨ ਅਤੇ ਡਾ. ਫਾਊਚੀ ‘ਤੇ ਗੰਭੀਰ ਦੋਸ਼ ਲਗਾਏ ਹਨ।
‘ਆਫਿਸ ਆਫ ਦ ਡਾਇਰੈਕਟਰ ਆਫ ਨੈਸ਼ਨਲ ਇੰਟੈਲੀਜੈਂਸ’ ਵੱਲੋਂ ਜਾਰੀ ਰਿਪੋਰਟ ਵਿੱਚ ਸਾਫ਼ ਕਿਹਾ ਗਿਆ ਹੈ ਕਿ ਜਦੋਂ ਡਾ. ਫਾਊਚੀ ‘ਨੈਸ਼ਨਲ ਇੰਸਟੀਚਿਊਟ ਆਫ ਐਲਰਜੀ ਐਂਡ ਇੰਫੈਕਸ਼ੀਅਸ ਡਿਜ਼ੀਜ਼’ ਦੇ ਮੁਖੀ ਸਨ, ਉਦੋਂ ਉਨ੍ਹਾਂ ਦੀ ਦੇਖਰੇਖ ਵਿੱਚ ਹੀ ਵੁਹਾਨ ਲੈਬ ਨੂੰ ਪੈਸਾ ਭੇਜਿਆ ਗਿਆ ਸੀ। ਸੀਆਈਏ (CIA) ਸਹਿਤ ਕਈ ਅਮਰੀਕੀ ਖ਼ੁਫ਼ੀਆ ਏਜੰਸੀਆਂ ਆਪਣੀ ਰਿਪੋਰਟ ਵਿੱਚ ਕਹਿ ਚੁੱਕੀਆਂ ਹਨ ਕਿ ਇਹ ਵਾਇਰਸ ਕਿਸੇ ਜਾਨਵਰ ਤੋਂ ਇਨਸਾਨਾਂ ਵਿੱਚ ਫੈਲਣ ਦੀ ਬਜਾਏ ਵੁਹਾਨ ਦੀ ਲੈਬ ਵਿੱਚੋਂ ਲੀਕ ਹੋਣ ਦੀ ‘ਵੱਧ ਸੰਭਾਵਨਾ’ ਰੱਖਦਾ ਹੈ। ਜ਼ਿਕਰਯੋਗ ਹੈ ਕਿ ਕੋਰੋਨਾ ਮਹਾਂਮਾਰੀ ਦੌਰਾਨ ਡਾ. ਐਂਥਨੀ ਫਾਊਚੀ ਅਮਰੀਕਾ ਦਾ ਮੁੱਖ ਚਿਹਰਾ ਰਹੇ ਹਨ ਅਤੇ ਉਹ ਰਾਸ਼ਟਰਪਤੀ ਜੋ ਬਾਈਡੇਨ ਦੇ ਮੁੱਖ ਮੈਡੀਕਲ ਸਲਾਹਕਾਰ ਵੀ ਰਹਿ ਚੁੱਕੇ ਹਨ।
