ਕਹਾਣੀਕਾਰ ਸ਼੍ਰੀ ਭੂਰਾ ਸਿੰਘ ਕਲੇਰ ਦੀਆਂ ਸਾਰੀਆਂ ਕਹਾਣੀਆਂ ਦੀ ਪੁਸਤਕ ਲੋਕ ਅਰਪਣ ਕੀਤੀ

17 ਦਸੰਬਰ 2023 ਦਿਨ ਐਤਵਾਰ ਨੂੰ ਪੰਜਾਬੀ ਦੇ ਪ੍ਰਸਿੱਧ ਕਹਾਣੀਕਾਰ ਮਰਹੂਮ ਸ਼੍ਰੀ ਭੂਰਾ ਸਿੰਘ ਕਲੇਰ ਦੀਆਂ ਸਾਰੀਆਂ ਕਹਾਣੀਆਂ ਦੀ ਕਿਤਾਬ “ਸਾਹਤਿਕ ਮੰਚ ਭਗਤਾ” ਵੱਲੋਂ ਪ੍ਰਸਿੱਧ ਸਮੀਖਿਆਕਾਰ ਸ੍ਰੀ ਨਿਰੰਜਨ ਬੋਹਾ ਦੀ ਪ੍ਰਧਾਨਗੀ ਵਿੱਚ ਅਤੇ ਵਿਸ਼ੇਸ਼ ਮਹਿਮਾਨ ਭਾਰਤੀ ਸਾਹਿਤ ਅਕਾਦਮੀ ਦਿੱਲੀ ਦੇ ਐਗਜੈਕਟਿਵ ਮੈਂਬਰ ਅਤੇ ਬਹੁ ਵਿਧਾਵੀ ਲੇਖਕ ਸ੍ਰੀ ਬੂਟਾ ਸਿੰਘ ਚੌਹਾਨ ਦੀ ਰਹਿਨੁਮਾਈ ਹੇਠ ਲੋਕ ਅਰਪਣ ਕੀਤੀ ਗਈ। ਸਮਾਗਮ ਦਾ ਆਗਾਜ਼ ਕਹਾਣੀਕਾਰ ਭੂਰਾ ਸਿੰਘ ਕਲੇਰ ਦੇ ਵੱਡੇ ਦੋਹਤੇ ਪਰਨਦੀਪ ਸਿੰਘ ਨੇ ਉਹਨਾਂ ਦਾ ਲਿਖਿਆ ਗੀਤ ‘ਇਹ ਦਿਨ ਚੜ੍ਹਦੇ ਦੀ ਲਾਲੀ ਏ’ ਨਾਲ਼ ਤੁਰੰਨਮ ਵਿੱਚ ਗਾ ਕੇ ਕੀਤਾ। ਸਾਹਿਤਕ ਮੰਚ ਭਗਤਾ ਦੇ ਪ੍ਰਧਾਨ ਸ. ਬਲੌਰ ਸਿੰਘ ਸਿੱਧੂ ਨੇ ਅਤੇ ਸਭਾ ਦੇ ਸਰਪ੍ਰਸਤ ਸ. ਤਰਲੋਚਨ ਸਿੰਘ ਗੰਗਾ ਨੇ ਸਾਂਝੇ ਤੌਰ ਤੇ ਆਏ ਹੋਏ ਮਹਿਮਾਨਾਂ ਦਾ ਸਵਾਗਤ ਕੀਤਾ। ਸੁਖਨੈਬ ਸਿੰਘ ਸਿੱਧੂ (ਪੂਹਲਾ) ਨੇ ਕਿਹਾ ਕਿ ਪੂਹਲਾ ਕਹਾਣੀਕਾਰ ਭੂਰਾ ਸਿੰਘ ਕਲੇਰ ਦੇ ਕਰਕੇ ਜਾਣਿਆ ਜਾਂਦਾ ਹੈ। ਪੂਹਲੇ ਤੋਂ ਵਿਸ਼ੇਸ਼ ਤੌਰ ਤੇ ਪਹੁੰਚੇ ਹੋਏ ਸ. ਹਰਬੰਸ ਸਿੰਘ ਸਿੱਧੂ ਨੇ ਉਨਾਂ ਨੂੰ ਹਾਸ਼ੀਆ ਗ੍ਰਸਤ ਲੋਕਾਂ ਦੇ ਚਾਨਣ ਮੁਨਾਰੇ ਦੱਸਿਆ। ਸ. ਗੁਰਦਰਸ਼ਨ ਸਿੰਘ ਲੁੱਧੜ ਨੇ ਕਲੇਰ ਦੀਆਂ ਯਾਦਾਂ ਨੂੰ ਤਾਜ਼ਾ ਕੀਤਾ। ਵਿਦਵਾਨ ਸ਼੍ਰੀ ਲਛਮਣ ਸਿੰਘ ਮਲੂਕਾ ਨੇ ਭੂਰਾ ਸਿੰਘ ਕਲੇਰ ਦੀਆਂ ਕਹਾਣੀਆਂ ਦੇ ਵਿਸ਼ਿਆਂ ਤੇ ਚਰਚਾ ਕੀਤੀ। ਨੌਜਵਾਨ ਗ਼ਜ਼ਲਗੋ ਕੁਲਦੀਪ ਸਿੰਘ ਬੰਗੀ ਨੇ ਉਹਨਾਂ ਦੇ ਸਾਹਿਤ ਸਭਾ ਬਠਿੰਡਾ ਨਾਲ ਜੁੜੇ ਹੋਣ ਦੀ ਗੱਲ ਕਹੀ। ਇਸ ਸਮਾਗਮ ਵਿੱਚ ਵਿਸ਼ੇਸ਼ ਤੌਰ ਤੇ ਸ਼ਿਰਕਤ ਕਰ ਰਹੇ ਸ੍ਰੀ ਭੂਰਾ ਸਿੰਘ ਕਲੇਰ ਦੇ ਫਰਜ਼ੰਦ ਅਤੇ ਫਿਲਮ ਨਿਰਦੇਸ਼ਕ ਬੀ ਕੇ ਸਾਗਰ ਨੇ ਉਨਾਂ ਦੀਆਂ ਕਹਾਣੀਆਂ ਤੇ ਬਣ ਰਹੀਆਂ ਦੋ ਫਿਲਮਾਂ ਬਾਰੇ ਜ਼ਿਕਰ ਕੀਤਾ। ਬਹੁ ਵਿਧਾਵੀ ਸ੍ਰੀ ਬੂਟਾ ਸਿੰਘ ਚੌਹਾਨ ਨੇ ਬੋਲਦਿਆਂ ਕਿਹਾ ਕਿ ਉਨ੍ਹਾਂ ਦੇ ਚਾਰੇ ਕਹਾਣੀ ਸੰਗ੍ਰਹਿ (ਪੰਛੀਆਂ ਦੇ ਆਲ੍ਹਣੇ, ਟੁੱਟੇ ਪੱਤੇ, ਤਿਹਾਇਆ ਰੁੱਖ ਅਤੇ ਬੇਗਮ ਫ਼ਾਤਿਮਾ) ਨੂੰ ਉਨਾਂ ਦੀ ਬੇਟੀ ਅੰਮ੍ਰਿਤਪਾਲ ਕਲੇਰ ਚੀਦਾ ਨੇ ਸੰਪਾਦਨਾ ਕਰਕੇ ਇੱਕ ਜਿਲਦ ਵਿੱਚ ਕਰਨ ਦਾ ਵਡਮੁੱਲਾ ਕਾਰਜ ਕੀਤਾ ਹੈ, ਇਸ ਉੱਤੇ ਜਲਦੀ ਹੀ ਖੋਜ ਕਾਰਜ ਅਤੇ ਆਲੋਚਨਾ ਦਾ ਕਾਰਜ ਕੀਤਾ ਜਾਵੇਗਾ। ਪ੍ਰਧਾਨਗੀ ਭਾਸ਼ਣ ਵਿੱਚ ਬੋਲਦੇ ਹੋਏ ਸ੍ਰੀ ਨਿਰੰਜਣ ਸਿੰਘ ਬੋਹਾ ਨੇ ਕਿਹਾ ਕਿ ਜੇ ਪੰਜਾਬੀ ਕਹਾਣੀ ਦੀ ਗੱਲ ਕਰੀਏ ਤਾਂ ਸ਼੍ਰੀ ਭੂਰਾ ਸਿੰਘ ਕਲੇਰ ਪੰਜਾਬੀ ਦੇ ਮੂਹਰਲੇ ਦਸ ਮੁਢਲੇ ਕਹਾਣੀਕਾਰਾਂ ਦੀ ਸਫਾ ਵਿੱਚ ਆਉਂਦੇ ਹਨ। ਉਨਾਂ ਦੀ ਕਹਾਣੀ ਕਹਿਣ ਦੀ ਸ਼ੈਲੀ ਬਾਅ ਕਮਾਲ ਸੀ। ਉਨਾਂ ਦੀ ਕਹਾਣੀ ਥੁੜ੍ਹਾਂ ਤੋਂ ਮਾਰੇ ਹੋਏ ਲੋਕਾਂ ਦੀ ਗੱਲ ਕਰਦੀ ਹੈ। ਸਟੇਜ ਦੀ ਕਾਰਵਾਈ ਸਾਹਤਿਕ ਮੰਚ ਭਗਤਾ ਦੇ ਜਨਰਲ ਸਕੱਤਰ ਮੈਡਮ ਅੰਮ੍ਰਿਤਪਾਲ ਕਲੇਰ ਚੀਦਾ ਨੇ ਬਾਖੂਬੀ ਨਿਭਾਈ। ਇਸ ਸਮਾਗਮ ਵਿੱਚ ਪਰਿਵਾਰਿਕ ਮੈਂਬਰਾਂ ਵਿੱਚੋਂ ਉਹਨਾਂ ਦੇ ਦੋਹਤਾ ਸਿਕੰਦਰਦੀਪ ਸਿੰਘ ਰੂਬਲ,ਦਾਮਾਦ ਕੁਲਦੀਪ ਸਿੰਘ, ਮਨਿੰਦਰ ਸਿੰਘ ਬੇਟੀ ਨਵਕਿਰਨ ਕੌਰ,ਪੋਤਾ ਹੁਸਨ, ਨੇ ਹਾਜ਼ਰੀ ਲਗਵਾਈ। ਇਸ ਮੌਕੇ ਭਗਤਾ ਪ੍ਰੈੱਸ ਕਲੱਬ ਦੇ ਪ੍ਰਧਾਨ ਸੀਨੀਅਰ ਪੱਤਰਕਾਰ ਵੀਰਪਾਲ ਸਿੰਘ ਭਗਤਾ, ਗ਼ਜ਼ਲਗੋ ਰਣਬੀਰ ਰਾਣਾ, ਕਾਮਰੇਡ ਜਰਨੈਲ ਸਿੰਘ ਭਾਈ ਰੂਪਾ, ਦਵੀ ਸਿੱਧੂ, ਰਜਿੰਦਰ ਕੌਰ,ਮਨਜੀਤ ਕੌਰ ਭਗਤਾ, ਸ. ਨਛੱਤਰ ਸਿੰਘ ਧੰਮੂ, ਹਰਜੀਤ ਸਿੰਘ ਗੰਗਾ, ਕਹਾਣੀਕਾਰ ਆਗਾਜ਼ਵੀਰ, ਪ੍ਰਿੰਸੀਪਲ ਹੰਸ ਸਿੰਘ ਸੋਹੀ ਕਿਰਨਦੀਪ ਭਾਈ ਰੂਪਾ ਜਸਵੀਰ ਸਿੰਘ ਕਲਿਆਣ, ਸੋਹਣ ਸਿੰਘ ਕੇਸਰਵਾਲੀਆ ਬੇਅੰਤ ਸਿੰਘ ਚੀਦਾ, ਆਮ ਆਦਮੀ ਪਾਰਟੀ ਦੇ ਨਛੱਤਰ ਸਿੰਘ ਸਿੱਧੂ, ਸੁਖਮੰਦਰ ਬਰਾੜ ਗੁੰਮਟੀ, ਮਾਸਟਰ ਸੁਰਜੀਤ ਸਿੰਘ, ਲੇਖਕ ਵਿਚਾਰ ਮੰਚ ਨਿਹਾਲ ਸਿੰਘ ਵਾਲਾ ਦੇ ਪ੍ਰਧਾਨ ਸ੍ਰੀ ਤਰਸੇਮ ਗੋਪੀ ਕਾ, ਕਵੀ ਸੀਰਾ ਗਰੇਵਾਲ ਰੌਂਤਾ ਪਹੁੰਚੇ ਹੋਏ ਸਨ। ਇਸ ਮੌਕੇ ਸਪਰੈਡ ਪਬਲੀਕੇਸ਼ਨ ਅਮਰਿੰਦਰ ਸਿੰਘ ਸੋਹਲ ਦੁਆਰਾ ਕਿਤਾਬਾਂ ਦੀ ਪ੍ਰਦਰਸ਼ਨੀ ਵੀ ਲਗਾਈ ਗਈ। ਅਖੀਰ ਉੱਤੇ ਮੰਚ ਦੇ ਮੀਤ ਪ੍ਰਧਾਨ ਸ਼੍ਰੀ ਸੁਖਵਿੰਦਰ ਕੁਮਾਰ ਚੀਦਾ ਨੇ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ।